政壇：鬍鬚曾出口術防拉布
掌管財金政策嘅財爺鬍鬚曾唔單止醉心武術同玩劍擊，每個禮拜日仲化身「鍵盤戰士」寫佢嘅網誌，樂此不疲。佢喺最近幾個周日發表嘅網誌，都刻意借題發揮大談政治議題，由已故國家領導人鄧小平嘅理論，到特區政府發售首批伊斯蘭債券等，寫吓寫吓最後都關政改事。尋日佢終於安守本分，冇再喺網誌中撈過界硬銷政改，改為討論國際稅務同金融帳戶資料交換問題。
設計圖片及對白
點解鬍鬚曾咁緊張呢樣嘢？皆因立法會十月復會在即，泛民主派早就揚言喺新一會期開波，佢哋就會就政府開設創新及科技局、「三堆一爐」撥款申請等項目發動拉布戰，務必會拖垮呢啲政策，負責嘅問責局局長都知道好難搞，到咗今時今日，各界估計泛民更加會發動全線拉布戰，以示不滿全國人大常委會對香港政改訂下嘅框架，最後隨時會影響到有關加強國際金融資料交換嘅立法建議。
換屆前須通過法案
鬍鬚曾解釋，為咗加強打擊跨國逃稅問題，經合組織早前公布咗最新嘅自動交換金融帳戶資料嘅標準，並要求香港等成員國及地區，喺二○一八年年底前完成相關工作。扣番要畀金融機構適應同落實新措施嘅時間，立法會須於一六年換屆前通過有關法案，時間相當緊迫，因此佢要為今次立法搶先向議員拉定票，希望泛民喺將來拉布時可以放過佢，以免連累香港符合唔到國際要求，甚至備受譴責。
雖然鬍鬚曾搶先向議員拉票，但泛民議員未必睬佢喎，倒不如鬍鬚曾喺呢段時間戙高床板，諗下有乜好橋剪布好過喇！
