鐵路藍圖雖吸引 加強監管最重要

當局又點睇呢？運輸及房屋局局長張炳良係咁講嘅，將來完成七個新項目之後，鐵路覆蓋率會增加到七成半，到時佔公共交通嘅比例只會增加到不足五成，專營巴士仍佔三成三，唔會構成壟斷。至於新項目涉及嘅資金，佢話工程高峰期每年開支係二百五十億元，仲低過目前興建緊五條新支線嘅二百八十億元喎。

即係咁，發展鐵路運輸係大勢所趨，交通網絡就好似人嘅血管，愈暢通身體愈健康；尤其係香港地少人多，道路愈來愈擠塞，加上人口不斷向新市鎮遷移，進一步擴展鐵路網絡，的確有實際需要。最怕係當局規劃失當，監管不力，萬一新項目又爆出工程延誤及超支醜聞，一千一百億元唔夠埋單，咁就該煨咯。

仲有吖，隨住鐵路網絡不斷擴展，市民對鐵路服務嘅依賴度愈來愈高，可惜港鐵管理反而愈來愈差，搞到事故頻頻，令人不勝其煩。張炳良口口聲聲話港鐵唔會造成壟斷，純屬欺人之談嘅咋，近年巴士服務因為受到港鐵擠壓而不斷萎縮，市民選擇愈來愈少，咁仲唔係壟斷？壟斷唔緊要，最弊係港鐵經常出事，市民身受其害，怨聲載道。

嗱，話口未完又嚟喇。尋日上午港鐵金鐘站發生訊號故障，荃灣線服務受影響，個個月台都逼到爆，乘客狠批港鐵故障不斷，簡直累街坊。又唔怪得乘客咁扯火嘅，港鐵幾乎三日一小跪，五日一大跪，佛都有火喇。正如有人話齋，港鐵出事已經唔係新聞，冇事至係新聞吖。

更恐怖嘅係，繼高鐵工程出現嚴重延誤及超支後，南港島線工程又爆出醜聞，有位當值嘅駐地盤爆破督導員因為要趕飛機出外旅遊，居然擅離職守，冇進行爆破後嘅檢查工作，問你怕未。雖然該督導員事後已被炒魷，但今次事件已足以證明港鐵管理幾咁混亂。

正所謂，工欲善其事，必先利其器。港府要擴展鐵路網絡，市民唔會反對，但首先必須整頓港鐵，加強管理，否則，以咁嘅管理質素及服務水平，工程延誤超支事小，隨時車毀人亡事大吖，叮！