潮語「裝B」係一個新學嘅潮，相信香港人會比較陌生，皆因大家見到個「B」字都會估計到呢個係一個大陸傳過嚟嘅潮語，一般喺啲大陸討論區先會見到。但最近，香港某啲討論區同社交網站都開始出現「裝B」一詞。根據百度百科資料「裝B」有兩個意思，一個係指一啲人以賣弄同做作甚至欺騙別人去達到目的，明明自己冇嘅才能或東西都「吹」到好似有一樣。另一個意思係相反，有人不斷「裝B」隱藏自己真正實力同目的，其實真正嘅目的係欺騙。

一班曾經令香港民怨沸騰嘅政客，十年後竟然打算捲土重來，就咁睇牌頭都知過氣管治班子真係想「敗部復活」，重返政壇。可能佢哋見到葉劉之流，Set過個頭去美國打個轉返來就可以東山再起，港人係唔會記得有啲人過去有幾咁差劣。又或者見到高官不斷「裝B」都冇人叫佢下台，管治劣迹斑斑都可以繼續玩，以致腳痛都要重新站起來，向已經衰無可衰嘅香港社會再伸多一腳。

有人喺網上指摘有啲港女「裝B」，拍拖目的只係為錢，呢個都係無可厚非。有啲九十後港女甚至連「裝B」都慳番，直接喺網上求包養，擺明車馬，以性同愛去換取生活。社會淪落至此，又係邊個嘅責任呢？會唔會又可以入前朝特衰政府佢哋嘅數呢？嚟緊大專生中學生即將搞罷課，爭取真普選。佔中三子又話十月「請飲」，喺呢個風頭火勢，舊電池又話要返嚟「覆啅」，香港今日真係群魔亂舞。依家只有希望大家唔好「裝B」，香港人行出嚟，爭取應得權益！

第一手消息請下載on.cc東網iPhone/iPad/Android/Windows Phone Apps