政壇：搞搞政：免費遊迪園象哥申報快

原來，香港迪士尼樂園間中都會邀請立法會議員入園參觀，佢哋下月有新賣點，最近都邀請咗議員去玩，象哥就係其中一個，早前仲同埋囝囝、新抱帶埋三歲半嘅孫女齊齊去迪士尼，可能受到有議員曾接受航空公司款待，豪遊法國嘅風波影響，象哥去完迪士尼後，唔夠一個星期就急急作出申報，真係做足冇甩拖。我哋仲八到，除咗象哥之外，仲有其他議員接受咗迪士尼款待，但暫時就未見到有其他議員申報喇。

象哥話，今個月十二號，佢同三個屋企人接受咗迪士尼嘅款待，包括自助晚餐、全新「迪士尼光影匯」夜間巡遊預覽及遊園。佢補充，以前迪士尼都有邀請議員o架啦，但自己都幾十歲，對呢啲嘢興趣唔大。不過，因為孫女之前去過一次迪士尼後，就一直嘈住話想再去，所以今次咁啱有免費門票，加上又有新設施，為咗睇吓政府公帑用成點，所以就一齊去睇吓喎。