政壇：謝偉俊着長衫亮相丹麥
話咁快，立法會北歐訪問團已近尾聲。尋日議員去咗今次旅程最後一站丹麥，仲參觀咗當地國會大樓等。不過，議會之間嘅交流活動並唔一定係西裝革履，謝偉俊（Paul）尋日就以一襲中式長衫亮相。
謝偉俊（中）喺丹麥出席議會交流活動時，以一襲長衫亮相。（互聯網圖片）
參觀及交流活動唔少得行行企企、周圍望望，我哋喺隨團議員上載社交網站嘅活動相片之中，就發現阿Paul嘅服飾好有特色，一襲長衫同着住西裝嘅其他男士們大異其趣，一眼就睇到，怪唔怪唔知，但一定予人特別印象。阿Paul平時喺香港都成日着老西，執得好四正，點解去到西方國家反而要着起中式男裝？唔通係借機會宣傳吓中國文化？抑或想洋人見識吓唐裝？
