元朗十八鄉鄉事委員會主席梁福元有個招牌「蛋糕頭」，早前佢「找數」接受冰桶挑戰，但個蛋糕頭淋完冰水後，冇耐就即刻彈番起，日前我哋喺元朗撞到佢，見佢泊車後急急腳上咗座商廈，原來係去髮型屋恤靚個髮，佢自爆貪靚，定時定候都要搵御用髮型師洗頭兼恤髮，確保蛋糕頭長期堅挺，幾十年如一日。

梁福元恤髮期間不忘收睇「on.cc東網」電視節目。

梁福元話，佢第日要同鄉紳參加福建高鐵團！所以恤定個靚髮，不過，佢一坐定就拿出手機狂撳，期間不忘分心用平板電腦收睇「on.cc東網」電視節目《房市知多少》，唔通佢想睇吓自己手持嘅丁屋升值多少？梁福元透露，佢每隔四、五日就上去洗吓頭，每個月都補電一次，呢位髮型師已經幫襯十年喇！

對於蛋糕頭已經成為佢個人商標，梁福元笑稱早已習慣被揶揄係僭建頭、鬆糕頭，仲聽過有人話佢似麥當勞叔叔、卡通人物「爆炸狗」甚至愛因斯坦，「好似觸電嚇親咁」，但佢自言從冇隔夜仇，對呢類「封號」通通得啖笑，唔會放喺心喎。

第一手消息請下載on.cc東網iPhone/iPad/Android/Windows Phone Apps