救生員年年罷工 康文署拖拖拉拉

呢嗱，尋日港九拯溺員工會十幾名代表遊行示威，抗議康文署採取拖字訣，遲遲唔肯商談增加人手及提升職系嘅訴求。佢哋要求當局盡快回應，否則會將行動升級，下個月發起連續性罷工咁話。

對於工會嘅要求，康文署署長李美嫦係咁講嘅，當局將針對季節性救生員短缺問題採取解決措施，包括推出泳灘救生員受薪培訓計劃及加快泳季高峰期招聘程序等；至於工會要求提升職系，佢就話希望年底深入討論喎。不過咁，救生員工會就批評當局敷衍了事，根本冇誠意解決問題。

正所謂，公說公有理，婆說婆有理，港府同救生員各執一詞，誰是誰非，外人好難判斷，但唔理雙方點樣鬥法，都唔能夠將市民當作籌碼。呢嗱，近年救生員罷工已成為常態，郁吓就集體請假，搞到泳客無所適從，怨聲載道。尤其係最近呢次，揀正中秋節翌日公眾假期罷工，擺明搵市民過橋啫。即係咁，救生員爭取權益係無可厚非嘅，但如果次次都對市民造成滋擾，咁就好難令人接受咯。

講嚟講去，救生員問題一直無法解決，主要都係因為港府無能。工會要求增加人手已經講咗十幾年，當局一直闊佬懶理，而每次救生員發起罷工，康文署亦淨係識得斬腳趾避沙蟲，除咗關閉泳池及泳灘之外，根本冇任何應變方案，直情當市民利益冇到，你話係咪不負責任吖。

當然，救生員係季節性行業，要增加幾多人手至足夠，一時好難計得清楚，而工會要求提升職系，同樣涉及公帑，亦唔可以草率決定，但咁唔等於當局可以闊佬懶理一拖再拖，更加唔等於可以對工潮視若無睹。須知救生員工潮頻頻，唔止令市民不勝其煩，而且隨時危及泳客安全，萬一搞出人命，呢隻鑊邊個孭得起吖？有人話，康文署辦事苟且，敷衍塞責，係工潮嘅罪魁禍首，真係一啲都冇講錯。

咪話太一叮唔提醒吖，康文署可以繼續拖延，救生員可以繼續罷工，但市民已唔可以繼續忍耐，唔該雙方盡快坐低，四四六六傾掂佢喇，叮！