潮語「官威」嘅解釋就有啲唔同，其實係指一啲人做人處事態度囂張跋扈，目中無人，狂妄自大，即係廣東俗語所謂「好似做咗官咁」。另一方面亦係指職場上一啲小頭目或主管，以職級欺壓下屬，呢啲人都可以被稱為「好大官威」。

聯合王國成員國之一嘅蘇格蘭最近搞公投，由全蘇四百多萬合資格選民投票，決定是否脫離英國獨立。呢件發生喺香港前宗主國嘅大事，當然引起香港人關注。今次投票中統獨兩派嘅支持度相若，只差約十個百分點。兩方支持者各自向蘇格蘭人宣傳，當中沒有激情激進嘅民族主義煽情煽動，獨派沒說甚麼「打倒英帝國主義！」「蘇國人民站起來！」「蘇人民族復興！」統派亦沒說甚麼「嚴懲分裂國家分子，打擊蘇獨叛徒！」當然英軍更加無喺英格蘭北部集結，皇家海軍戰艦無喺北海演習，試圖恐嚇分離分子。統獨各自表述統獨利弊，由每個蘇格蘭人以自由意志自主自決民族命運，一切和平而理性，進步而文明。甚至雙方沒大爆政治黑材料，說英國首相卡梅倫家中僭建，蘇獨領袖勾結境外勢力分裂國家。這次投票正好表達出甚麼是進步、民主與文明，這些在「官威」十足的內地官員眼中，是再過一百年都不會明白的。

「官威」照表面是解作官員的威權，甚至係指一啲人仗着自己做「官」嘅身份，欺壓百姓，恃強凌弱。呢啲事喺大陸只係同吃喝拉睡一樣，是生活一部分，係中國特色社會主義下的產物。聽講大陸一個縣官嘅「官威」，比西方國家一個部長還要厲害，出入都要民警開路。

潮語「官威」其實係來自周星馳主演嘅一套舊戲，戲中周星馳飾演嘅清官包龍星喺審案期間，殺出個太監李公公攪局。其中李公公有句經典對白就係說包龍星：「好大嘅官威啊！」多得電視台將呢套戲每年重播，以至後來呢句「好大嘅官威！」被用咗嚟做潮語。

以前港督甚至英女王落區，普羅大眾都可近距離接觸，握手傾偈完全無問題，時至今日，內地求其一個官員來港，唔好話示威者，市民連佢架車嘅尾燈都見唔到，加上特區政府又喺「門常開」公民廣場架起圍欄，呢啲「官威」嘅表現，正正是愈大嘅「官威」，為政者愈自卑吧。

第一手消息請下載on.cc東網iPhone/iPad/Android/Windows Phone Apps