政壇：搞搞政：總辭杯葛補選 泛民左閃右避
喺全國人大常委會決定政改框架後，人民力量立法會議員陳偉業曾倡議二十七名泛民主派議員總辭，之後再透過補選入番去，以爭取市民授權否決方案。聽落呢個倡議已經好激，點知尋日有學者提議泛民議員總辭之餘，仲要杯葛補選，直至一六年立法會選舉為止，真正向北京公開表示不合作態度，亦畀泛民深刻反思其角色。之不過，呢個咁激嘅建議，連人力都有保留，部分議員更加左閃右避。
設計圖片及對白
梁耀忠話提議呃人
我哋問過多名泛民議員，白鴿黨胡志偉就話佢哋經選民授權，如果市民支持「袋住先」，咪喺一六年投票畀建制派，等佢哋有三分之二票通過政改，到時咪見真章囉。街工梁耀忠亦直指提議係「披住羊皮呃人」，有訴求就直接啲，唔使咁迂迴曲折。連支持總辭嘅人力陳志全都話建議係扮激進，講明佢哋係想投票反對政改方案。
不過，都唔係所有人都反對建議，好似社民連「長毛」梁國雄坦言呢個係好機會，等泛民總結機會，更新理念同策略，但就希望泛民要集合民間支持力量。新民主同盟范國威亦指出，作為策略係有得諗，又指○九年早有人提過。不過，最終泛民係豁出去，定係戀棧權位，時間就可以證明一切喇！
