政壇：陳稼晉讚陳南祿好老闆

馬會大董葉澍堃日前趁跑馬日喺快活谷宴請百仁基金成員，基金主席李文俊臨時因公務急飛重慶，所以由包括胞弟李文斌在內嘅幾位副主席及會員出席。期間基金副主席陳稼晉巧遇馬會大董陳南祿，看來兩人似乎好熟落，原來陳稼晉曾任職國泰航空機師，同做過國泰高層嘅陳南祿係舊同事，難怪兩人咁好傾啦。

陳稼晉（右）喺馬會廂房巧遇前上司陳南祿（左），諗起當年做機師嘅難忘回憶。

陳稼晉盛讚陳南祿係好老闆，事關○三年沙士爆發時航空業一片蕭條，陳南祿當時經常會約唔同機師閒話家常，一來安撫人心，二來聽取意見，當年陳稼晉有份獲約見，仲咁啱坐喺陳南祿隔籬，所以留低深刻印象。

難忘當年飛機失靈

講起做機師嘅經歷，陳稼晉話最難忘係有次出勤時，航機起飛冇耐就發現引擎失靈，於是向控制塔發出求救訊號，好彩最終有驚無險喺目的地機場安全降落。嗰次係佢首次親口講出求救訊號，所以畢生難忘。

講番當晚飯局，出席嘅仲有基金副主席陳寧寧、羅詠詩、廖宇軒同國際小母牛香港分會籌款委員會成員張詩培等人。葉澍堃話今次請客係因為好開心獲邀擔任百仁基金旗下獎學金嘅評審委員，希望日後多啲同呢班熱心嘅年輕企業家交流做善事心得。期間眾人一邊閒談一邊投注，仲問葉澍堃攞貼士，但最終都係鋪晒草皮。