政壇：四叔掃自家股外吸新地

新地上個禮拜五公布全年業績，雖然純利跌，但基礎盈利就交到貨，升15%。四叔喺業績公布後嘅第一個交易日（星期一），即刻郁手，喺場內增持80.2萬股，每股平均價117.808元，涉資一億有找，好倉由0.13%升至0.16%。四叔多次喺公開場合講過「買地產股好過買樓」，喺佢眼中，地產股包括埋新地。

呢排四叔集中掃自己旗艦公司恒地，最新一次亦係今個星期一，喺場內增持45.7萬股，以每股均價55.702元計，只係2,545萬元，細數目啫。

連埋呢次，四叔已連續十三個交易日掃「自家股」恒地股份，涉及超過十二億元，四叔持股量更升到67.64%。睇番四叔掃新地嘅往績，次數唔算多，對上一次應該係今年五月七日，當日又係兩隻一齊掃，加埋都唔使三千萬元。大孖沙通常只會增持自己股票，好少減持，小股東係咪要跟風，自己判斷啦。