政壇：姚珏率弟子車站奏《梁祝》
聽古典音樂，唔係一定要走入華麗音樂廳，著名小提琴家姚珏就「走出去」，尋日傍晚六點放工時段，喺港鐵香港站舉行四十五分鐘街頭音樂會，即場演奏扣人心弦的精華版《梁祝》。姚珏薄施脂粉，穿起貼身長裙，有別於一般街頭音樂家的粗豪形象，優雅風姿吸引逾百市民圍觀。
姚珏同十多位弟子奏起一段《梁祝》樂章，吸引行色匆匆的途人駐足欣賞。
喺熙來攘往嘅港鐵站表演，姚珏話係受國際大提琴家馬友友啟發，因為對方去年聖誕節在芝加哥商場演出，令佢覺得音樂應該走出去，為市民服務。同觀眾近距離接觸，豪爽嘅姚珏形容心情好激動，佢專登帶埋十多位弟子同台演奏，磨練吓佢哋嘅演奏功力。佢話地鐵站人聲鼎沸，唔似音樂廳咁靜，演出時要更集中、更靈活，久而久之，對音樂家係一個非常好嘅鍛煉。
被問到怕唔怕市民太熱情突然送上「熊抱」，姚珏笑言唔擔心：「熱情係一種鼓勵，就算沒有掌聲，我也不介意。」因為佢演出時會全神貫注享受音樂，唔會理會四周圍嘅環境喎！
