政壇：職工盟批蘋果剝削

捲入政治捐款醜聞而變得異常低調嘅工黨立法會議員李卓人真係「頭頭碰着黑」，尋日又被網民翻舊帳。iPhone 6手機尋日開始喺本港瘋炒，一批大學師生監察無良企業行動成員早上就去到中環ifc商場間蘋果旗艦店外抗議，批評蘋果喺蘇州嘅代工廠剝削員工。李卓人所屬嘅職工盟亦派員到場聲援行動，但有心水清嘅網民就搵番一張李卓人嘅舊照，見佢手持iPhone同腋下夾着部iPad，揶揄佢身為「果粉」講一套、做一套，更附上抵死對聯：「工人做到死死下，卓人賤到笑哈哈」。網民更呼籲示威者下一站應到李卓人嘅議員辦事處抗議喎！我哋都有翻查資料圖片，發現網民所言非虛。