政壇：黃之鋒主場 爆口水戰
學民思潮召集人黃之鋒一向言行惹火，早前宣布升讀公開大學政治及公共行政學系後，不但冇因為該校校長黃玉山被指背景「深紅」而轉趨低調避免惹麻煩，反而有份帶領該校學生會發動罷課，獲六百師生簽名支持，帶起公大政治氣氛。公大尋日喺校內舉行政改論壇，邀請之鋒同教聯會副秘書長林樂、愛港之聲主席高達斌、社民連副主席黃浩銘等惹火人物對陣，雙方再爆口水戰，但之前曾畀建制派鬧「唔夠秤」嘅之鋒佔主場之利，作客嘅林樂同高達斌蝕晒章，仲接連失言。
設計圖片及對白
黑社會論被鬧爆
之鋒宣布升讀公大後，曾經話唔想啲人講佢「搞政治讀唔掂書最後咪要入OU（公大）」，有傳言論惹起公大學生不滿，仲一度有傳校友考慮發聯署聲明，對之鋒言論表示遺憾。
話說教聯會會長黃均瑜早前將鼓勵罷課嘅學生比喻為黑社會，甚至伊斯蘭聖戰分子，之鋒話唔知自己「邊一忽似黑社會」，要求林樂代表教聯會澄清，但林樂反而叫之鋒「你自己檢討咪得囉」，又唔肯回應「黑社會」論係咪代表教聯會，仲激動到企起身叫之鋒「你自己諗啦，做人做咁耐！」令全場幾十名學生嘩然，群起發言鬧爆林樂。
除咗林樂，高達斌亦接力話學生叫人罷課，搞到其他學生冇得上堂、考試，就好似黑社會教人點樣打家劫舍賺錢，同教人走歪路、走私冇分別，而高達斌不但唔肯就言論道歉，仲叫學生唔好對號入座。總之成個論壇大家就喺度鬧來鬧去，口水戰一輪就散場。
