瀝青路溶溶爛爛 路政署害人不淺

大家都知，本港唔少行車道路用瀝青鋪設，本來好正常，奇就奇在出名耐用嘅瀝青竟然變得化學又兒戲，幾個月就變晒形。唔係講笑o架，本報記者巡查後發現「四大黑點」，全部出現瀝青嚴重變形情況。最離譜嘅首推沙田鄉事會路，今年三月先至重鋪，上月已經耗損變形，部分瀝青被壓向路邊，連帶黃色路線都扭曲埋，車輛經過時上下劇烈搖晃，簡直係一步一驚心。

第二個黑點係龍翔道往黃大仙方向，瀝青溶溶爛爛，司機一係要減速，一係要兜路；第三個黑點係沙田大涌橋路往大圍方向，瀝青唔止凸起，仲有碎石脫落添；另一個黑點係公主道往紅隧方向，去年九月先至重鋪路面，家陣已經出現約五米長嘅瀝青凸起，你話係咪兒戲吖！

咪以為瀝青變形係小事呀，正如教車師傅話齋，路面凹凸不平絕對唔係講玩，隨時出現搶軚失控，引發意外；揸電單車更大鑊，分分鐘失控翻車，搞出人命都有之。

講到呢度，你可能會問，瀝青明明出名耐用o架，點解家陣變得咁化學呢？冇錯嘞，連業內人士都話，瀝青道路嘅壽命一般超過十年，家陣使用不足半年就凹凹凸凸，情況絕對唔尋常，估計可能同鋪設人員嘅手工、技術參差，以及機器使用程序不當有關咁話。

即係咁，鋪路工人求求其其，馬馬虎虎，固然唔應該，但負責監管嘅路政署唔通唔使負責任嘅咩？如果唔係路政署對承建商放任自流，闊佬懶理，又點會搞到咁多甩漏吖？其實，同類事件已經唔係第一次嘞，好似專為視障人士而設嘅行人路示警磚咁，咪又係因為路政署監管不力，搞到唔少地方日久失修，唔能夠防滑示警之餘，仲變成跣人陷阱，莫講話視障人士防不勝防，連視力正常嘅市民都隨時中招，你話係咪大整蠱吖！

講開又講，路政署胡混度日都唔係新聞嘞，淨係由該署監督嘅高鐵及港珠澳大橋等基建工程，已經甩漏多多，延誤及超支當食生菜。你話嘞，港產官僚大事做不成，小事做不了，仲有乜資格學人講「適度有為」吖，犯少啲錯已經阿彌陀佛咯，叮！