城中鏡：沈祖堯中秋聯歡唱名曲
全港多間大專院校就政改發動罷課正進行得如火如荼，中文大學作為其中一間罷課嘅先驅，前晚忽然怨氣全消，原來中大教職員趁前晚月圓之夜，喺該校崇基學院眾志堂舉行中秋聯歡會，校長沈祖堯除咗現身聯歡會與眾同樂，仲大展歌喉拉埋同事合唱經典名曲《Moon River》，祝願學校同事中秋節快樂。
沈祖堯（中）大展歌喉拉埋同事合唱。
前晚嘅聯歡會有多達四百幾個教職員參加，節目除咗有中國傳統雜技表演、猜燈謎、大抽獎、民間手工藝製作等例牌晚會節目，有教職員仲以披頭四、四朵金花等造型獻唱多首經典名曲，其中沈祖堯仲特別獻唱由柯德莉夏萍原唱嘅《Moon River》，掀起全晚高潮。書法了得嘅沈祖堯仲獻出自己嘅墨寶，送畀抽獎環節中中獎嘅同事添！
