郭羅桂珍尋日抽空出席音樂會。
城中政商界名人尋日齊齊現身一個音樂會，包括莎莎國際主席郭少明嘅太太郭羅桂珍，仲有太子珠寶鐘錶主席鄧鉅明博士同太太鄧宣宏雁等。鄧太仲透露特意喺中秋節前夕回鄉過節，佢話：「我鄉下喺昆明，同埋細仔（鄧亦竣），一家三口返去，尋日先返嚟香港，同鄧生媽咪過節。」
鄧鉅明同鄧宣宏雁喺中秋節回鄉過節，大讚昆明景色好靚。
而鄧生亦大讚當地景色好美麗，佢話：「昆明真係值得一去，想介紹畀大家。當地慶祝中秋嘅習俗都係小朋友玩吓燈籠、賞月同圍埋一齊食水果，最特別係去到機場有人表演京劇，當地人稱之為滇劇，以前都冇，可能因為中秋節先有。」鄧太又指離開昆明前，收到航空公司送贈嘅月餅，感覺非常窩心。
點解長子鄧亦軒同次子鄧亦棋未有一齊回鄉過節？鄧生就話：「佢哋要過二人世界，中秋都係情人佳節，因為兩個仔都有拖拍，但仲選擇緊。至於結婚就順其自然，唔想佢哋覺得我哋係催促。」佢坦言恨抱孫，但唔急。
第一手消息請下載on.cc東網
