城中鏡：仁濟籌款奇想玩跳冰池
冰桶挑戰熱潮令貪玩一族喺今個暑假玩得極盡興，亦令肌萎縮性脊髓側索硬化症（ALS）病患受到前所未有嘅關注。咁啱仁濟醫院旗下永強全癱病人基金（下稱基金）今年邁向十周年，一班仁濟醫院董事局成員早前趁飯聚時密密傾，諗住趁勢玩創意籌款，為紓緩病人同照顧者壓力籌多啲善款，令行善唔流於沉悶。
王賢訊（左起）、馮卓能同總理鮑誠業齊齊度橋搞創意籌款。
蘇陳偉香（左二）同仁濟醫院副主席嚴徐玉珊（右二）、總理黃美斯（左一）同湯振玲（右一）喺聚會上開心飲杯。
蔡百泰（左起）、羅嘉穗同洪少陵齊分享辛苦籌建思親公園後嘅成果。
身兼基金主席嘅仁濟醫院主席蘇陳偉香話，基金成立以來共撥款近一千二百萬元，約二百幾人受惠，援助對象包括肌肉萎縮症、因嚴重頸椎受損及腦部受創而全身癱瘓病人，基金除咗幫佢哋添置醫療用品外，仲資助聘請照顧者費用，令病人可以在家中療養，唔使因為入住院舍而與家人分開。咁有意義嘅善行，梗要大力宣揚開去啦！
點名靚女總理先跳
仁濟醫院副主席馮卓能同王賢訊亦係基金成員，一班後生仔一邊食飯一邊度橋時話，要搵總理葉恭正家中大泳池搞聚會，然後放冰入水中，被點名嘅要着泳衣跳入冰池。有人聽到連聲叫好，仲話要點名靚女總理跳喎！總理吳國榮就話到時要點名其他善團一齊玩。不過，講講吓，有人醒起泳池咁大，咪要放勁多冰先夠凍？唔知最後會係點玩呢？
咁啱仁濟旗下骨灰龕場思親公園舉辦祝捷午宴，做過仁濟醫院主席嘅羅氏慈善基金主席羅嘉穗、蓬瀛仙館理事長洪少陵同仁濟醫院前主席蔡百泰都有到場。蔡百泰話，喺十幾年前佢做主席任內有位善長捐出屯門青山村一塊地，於是佢哋搵蓬瀛仙館一齊合作建成擁有五千個龕位嘅思親公園，至今已取得收支平衡，認真飲得杯落。
