設計圖片
叙福樓集團執行董事Simon黃傑龍舊年參與電台節目《窮富翁大作戰》，因為基層市民一句「一年未食過牛肉」而感觸喊爆，更啟發佢推廣「待用飯」概念扶貧。佢話有感富裕階層同基層好少直接交流，所以特別發起港產「破冰挑戰」（ice breaker challenge）。
達到「破冰」目的
呢項挑戰係要求被點名人士喺四十八小時內，主動喺街頭向一個基層市民打開話匣子，關心佢哋嘅生活，並同佢哋分享超市禮券、待用飯券等禮物，以達到「破冰」目的。唔單止咁，仲要喺對方唔上鏡嘅前提下，將破冰過程偷偷哋拍低上載社交網站，確保有片有真相。若然挑戰失敗，就要向提供待用飯嘅食肆買十個飯「找數」。
Simon早幾日就率先點名Green Monday創辦人楊大偉、香港資訊科技商會主席黃岳永同另一「窮富翁」立法會議員「田二少」田北辰「挑機」。田二少除咗自淋冰水找數，隨即搞到傷風，仲喺社交網站好大口氣咁話唔使拍片驗明正身，因為日日已經不停「應戰」，每逢端午、中秋呢啲大時大節，仲會到訪安老院派禮物。
田二少更反挑戰Simon，要求對方一個月內到訪三間安老院，安排節目或表演氹老友記開心，仲要影相或拍片分享確保「數已找」，否則就要向護老慈善團體捐款。雖然田二少自稱日日已經不停「應戰」，但Simon就希望佢照樣買一百幾十個待用飯「找數」，田二少當然冇拒絕啦！睇嚟二人沒完沒了咁互相挑機，要幾時先至宣布停火協議呢？但為咗慈善，辣多幾個火頭都唔緊要啦！
第一手消息請下載on.cc東網
