梁繼昌請人最低要求要碩士畢業，但最近就破例請咗個未達要求嘅公關。（資料圖片）
部分僱主喺請人嘅時候，都會考慮應徵者嘅工作經驗同表現，學歷往往係其次，但立法會會計界議員Kenneth梁繼昌就啱啱相反，請人時專揀高學歷。依家佢辦公室六位職員，有一半擁有碩士學歷，當中有人仲喺海外名牌大學嘅政治系畢業，議辦實力冠絕其他議員。
Kenneth早前請過社運人士周澄做助理，負責研究環保政策，但周澄喺個幾月前辭職去英國讀書，所以又再出現空缺。喺千挑萬選之下，佢終於揀咗一個曾經做過電台主播嘅前傳媒人做公關，負責同傳媒打交道。佢透露，雖然呢位新職員冇碩士學歷，但就話對方勝在精通德文，加上勤奮積極，做咗唔夠一個月就話要去進修，令佢不知幾開心。
雖然Kenneth唔似部分機構咁會為員工提供進修津貼，但佢話為推動職員進修，會容許同事早啲放工，等佢哋夜晚去上堂時唔使趕頭趕命，睇嚟佢呢個僱主都唔錯喎！
第一手消息請下載on.cc東網
