政壇：阿哥唔撐黃錦輝入熱廚房
香港政治氣候多變，尤其係行政及立法關係愈嚟愈緊張，令到政府「熱廚房」似足香港夏天氣溫咁，一年熱過一年，講起入官場，愈嚟愈多人都叫怕怕。盛傳係籌組中嘅創新及科技局（下稱創科局）副局長熱門人選嘅中文大學工程學院副院長黃錦輝，雖然一直未正式表態係咪接受呢項工作，但係佢屋企人就好驚佢入政府後被政客糟質，受盡冤氣。黃錦輝嘅大哥、九龍表行集團董事總經理黃錦成直言，唔係好支持細佬入熱廚房，事關人在官場，郁親都被鬧，依家喺學術界發展咪幾好！
設計圖片及對白
黃錦成新書談及家人，其中講到胞弟黃錦輝。
開局前景唔樂觀
又難怪做大哥嘅憂心嘅，事關喺新政府上場後，曾經提出「五司十四局」架構重組方案，其中包括成立科技及通訊局，但由於泛民「拉布」而令計劃胎死腹中。事隔近兩年，今年四月政府再次啟動成立創科局嘅工作，雖然業界期望可以盡快開局，但仍然受立法會議員「拉布」阻礙，未能趕及喺上個會期通過。有激進泛民主派嘅議員早就揚言，立法會新立法年度開波之後，亦會繼續就創科局開局申請拉布阻撓開局前景唔樂觀。開局難，開到局條路都唔易走！
好少講家事嘅黃錦成最近出咗本名為《調情》嘅自傳，先至揭開佢有六個兄弟姊妹，而父母早逝嘅故事，原來黃錦輝就係黃家老六。黃錦成話，佢二十六歲那年父親突然離世，留下佢哋七個兄弟姊妹，其中最細嘅弟弟才十一歲，排尾二嘅黃錦輝就十四歲。黃錦成係家中長子，惟有擔起照顧手足嘅責任，雖然當年佢沉醉於實現做飛機工程師嘅夢想，但都要被迫放棄。
為咗照顧細佬妹，佢決定與相識僅八個月嘅太太結婚，一齊承擔「長兄為父、長嫂為母」嘅責任，眨吓眼四十年，幸好黃家幾兄弟姊妹後來個個事業及學業有成。黃錦成話，今次出書都係因為覺得欠咗太太好多，所以依家兩夫妻若有爭執，佢都會講少句：「因為欠咗佢嘛！」
