成也個人遊，敗也個人遊。內地旅客數目屢創新高，令香港經濟得益唔少，但副作用亦唔少o架，除咗引發中港矛盾之外，由於配套設施不足，旅巴違泊問題愈來愈嚴重，誇張啲講句，分分鐘成為下一波官民衝突嘅戰場。

唔係講笑o架，只要去尖沙咀睇吓，就知道旅巴違泊問題有幾嚴重嘞。嗱，二○一一年八月至今年七月期間，警方共接獲逾一千五百宗相關投訴，發出逾萬張「牛肉乾」，你話係咪誇張吖？有巴士乘客向本報投訴，指每次巴士駛經漆咸道南時，都被旅遊巴重重圍困，搞到巴士埋站都有困難，有老人家仲要喺馬路中心落車添，真係睇見都牙煙。仲有吖，有駕車人士指每次駛經梳士巴利道，「旅巴陣」都會搞到車輛寸步難行，明明幾分鐘嘅路程，要用幾倍時間至行完。咁塞法，佛都有火喇！

正如區議員話齋，內地旅客愈來愈多，旅巴數量亦愈來愈多，一停就係個幾兩個鐘，唔引發交通大混亂至奇吖。最弊嘅係，街坊即使報警都冇用，事關警方只會短暫執法，治標唔治本，過後問題依然存在。

話時話，早前網上有一段尖沙咀旅巴司機大戰警員嘅視頻曝光，引起全城關注。事緣司機因為等候泊位，被迫將旅巴停喺雙黃線，結果畀警員抄牌，司機據理力爭，搞到幾乎動武咁滯。即係咁，司機違法在先，警員執法無可厚非，之但係，有頭髮邊個想做瘌痢吖，如果旅巴泊位充足，司機又使乜周街亂泊喎。

其實，油尖旺區議會早就意識到問題嚴重，曾多次要求運輸署增加旅巴泊位，又建議將麼地道巴士總站暫時開放畀旅巴停泊，點知運輸署闊佬懶理，聲稱區內已有約一百個旅巴泊位，夠用咯喎，又話巴士總站嘅設計唔啱旅巴使用，拒絕區議會嘅建議。喂，如果泊位夠用，就唔使搞到七國咁亂喇！

業界人士係咁講嘅，區內旅巴泊位話就話有成百個，但零星分散，旅巴司機要揸住一部龐然大物周圍搵位，根本係強人所難。最無奈嘅係，好多司機為咗等泊位，連廁所都唔敢去，要帶個水樽喺身邊解決生理需要，真係有苦自己知o架！

見微知著，從旅巴泊位咁小嘅問題，就睇到港產官僚係幾咁廢嘞。港府一方面聲稱旅客人數無上限，一方面唔肯增加旅遊配套設施，唔出事先奇喇。唔係危言聳聽o架，旅巴違泊問題已蔓延多區，連唔算旅遊熱點嘅北角區都唔例外，再咁落去，唔使勞煩反對派佔領中環，淨係旅巴就可以癱瘓全港嘞，叮！

第一手消息請下載on.cc東網iPhone/iPad/Android/Windows Phone Apps