彩星玩具有九成收入都係嚟自「忍者龜」，「忍者龜」熱潮大大話話都玩咗二十幾三十年，既然仲有市場價值，彩星一於「食住上」，今年率領「忍者龜」進軍內地市場。執行董事杜樹聲仲話，為配合第二季「忍者龜」卡通片在內地播放，專登搵嚟台灣歌手吳建豪同內地新進歌手李祥祥合唱普通話主題曲，趁尋日公布業績，順便播埋MV畀大家先睹為快！

杜樹聲

佢話第一季「忍者龜」卡通片已經喺央視播出，現正就第二季卡通片進行審批同配音，不過首隻 「忍者龜」普通話主題曲經已錄製完畢！首歌一開始吳建豪同李祥祥就好投入咁不停重複唱「忍者神龜，戰無不勝、忍者神龜，戰無不勝」，中段仲有穿插幾段Rap介紹各位主角，非常Hiphop！

聽管理層話依家播緊嘅「忍者龜」已經係第三代，喺畫功同故事內容方面都有所提升，成功吸引歐美小朋友注目。之但係，印象中「忍者龜」係八十年代產物，比「美少女戰士」更長壽，對於呢套卡通片能夠感染幾代小朋友，真係覺得好不可思議！

第一手消息請下載on.cc東網iPhone/iPad/Android/Windows Phone Apps