政壇：搞搞政：峯鴿報培訓激進恐難出選

峯鴿喺年初中西區區議會轄下嘅公民教育工作小組上，建制派同佢就係咪開放會議畀公眾旁聽一事發生爭拗，最後搞到要報警收場，自此初試啼聲。可能佢以為鬧事就有得曝光，之後有理冇理就抗爭，雖然佢因而廣為人識，但係佢嘅出位表現亦引起黨內大佬不滿。

港島區依家由單仲偕同甘乃威話事，兩人係黨內出名嘅溫和派，唔鍾意用激進抗爭手法吸引選民同傳媒眼球。前排區議會拒絕峯鴿提出「平反六四」議案，結果峯鴿就激動鬧事，搞到畀保安強行抬走，同區嘅鄭麗琼即時同佢劃清界線，重申白鴿黨唔鼓勵黨員喺區議會用激進嘅手法表達訴求，令黨友同佢格格不入枱面化。

據講港島區三位南區區議員柴文瀚、羅健熙同區諾軒，早已報名參加新星計劃，加上三人都有一定形象同實力，如果白鴿黨最後真係要揀一個人參選立會，有排都未輪到峯鴿，睇嚟佢最後都係陪跑居多。

我哋問過峯鴿，佢承認已報咗名參加培訓計劃。佢話黨一直行中間溫和路線，覺得個黨可以再強硬少少，於是決定報名參加黨內甄選，睇吓有無機會代表黨參加立會選舉。被問到黨友唔係好認同佢嘅激進行為，佢就話冇諗咁多嘢。