政壇：巴菲特教老婆遺產投資
互惠基金領航集團甚少回應資金出入，費事畀人話「吹水」，但創辦人博格爾日前竟然send咗個e-mail畀「股神」巴菲特，讚佢係領航最佳Sales，仲好謙虛話自己作為老闆都只係夠膽認第二，到底發生乜事，令呢位指數型基金先驅、比巴菲特年長一歲嘅投資名宿轉性開金口？
巴菲特被讚係領航最佳Sales。（資料圖片）
原來巴菲特三月寫咗封信畀老婆，教佢點投資遺產入面嗰舊cash，百分之十買短期國債，剩番百分之九十就買啲收費平嘅標指基金，仲話「識買，梗係買領航嘅標普500指數基金」。
有「股神」做代言人，領航標指基金之後五個月狂吸五十五億美元資金，比舊年同期多近三倍，仲帶挈領航管理資產首度逼近三萬億美元，依家全球十大暢銷交易所買賣基金（ETF），七隻係領航，ETF產品今年嘅吸資能力僅次於貝萊德。晨星（Morningstar）資料仲顯示，領航債券資產已經超越「債券大王」格羅斯打骰嘅太平洋投資管理。
