話說社運人士楊匡同內地維權人士劉沙沙喺舊年三月尾閃婚,當時兩人只係相識六個星期,但原來幸福日子咁快過完,早兩日劉沙沙喺社交網站單方面宣布將同楊匡離婚,究竟呢段革命感情出咗乜問題?

楊匡(左)同劉沙沙的一段革命感情面臨考驗。(資料圖片)

第一時間搵楊匡問清楚,佢話早前沙沙不幸流產,備受打擊,加上不時有人喺網上批評兩人嘅婚姻,搞到沙沙成日唔開心,情緒好困擾。佢覺得沙沙並非真係想同佢離婚,只係一時衝動,佢相信仲有得挽救。

楊匡又話,由於自己早前被控偷越國境罪遭內地拘捕,至今仍然唔可以自由出入內地,沙沙小產後變得非常虛弱,唔可以成日嚟香港,佢亦上唔到去,所以即使知道愛妻唔開心,但都只可以喺網上留言安慰佢,做唔到啲咩實際嘢。佢仲話睇到沙沙嘅留言後覺得非常傷心,又自責自己近來官司纏身,唔可以即時離開香港搵太太「箍煲」,惟有寄望太太嘅情緒可以盡快恢復,回復昔日嘅甜蜜日子。

第一手消息請下載on.cc東網iPhone/iPad/Android/Windows Phone Apps