人生有幾多個十年!能夠喺一間公司做上十年以上,都係好值得珍惜嘅員工。美資行花旗每年都會搞晚宴,同喺公司工作超過二十五年嘅現職或前任同事食番餐飯,由於花旗喺行內有「少林寺」之稱,培育出一批銀行界精英,所以上星期喺佢哋個「舊生及銀禧職員會晚宴」都有幸見到唔少財金猛人。

盧韋柏(左)提名陳子政攞卓越舊生獎。

全場最矚目嘅一定要數花旗香港區前行長TC陳子政,佢喺花旗工作超過二十七年,由管理見習生做到行長,○七年退休嗰陣先得五十歲,羨慕死人。TC同我哋分享,其實佢喺三十歲嘅時候已經決定咗五十歲要準時退休,開展人生新階段。依家佢退而不休,縱使好多人話佢退休後生活好似仲忙過返工嗰時,佢笑說無論係「有糧」或「無糧」,都會好投入及享受,仲以自己嘅影響力繼續服務社群。

當晚TC拎嘅係今年嘅「卓越舊生獎」,拎得呢個獎嘅人絕對係重量級人馬。TC話要多謝花旗香港及澳門區行長Weber盧韋柏提名佢,又希望同學會嘅同事們可以繼續傳承「少林寺」呢個優良傳統,培育出更多業界精英。

第一手消息請下載on.cc東網iPhone/iPad/Android/Windows Phone Apps