政壇：學民無本示威夠創意
全國人大常委會前日通過決定，就香港特首普選訂出明確嘅框架，佔中三子同泛民主派當晚發起集會，而學民思潮嘅成員仲喺集會後去到全國人大常委會副秘書長李飛來港下榻嘅君悅酒店抗議，喺外邊衝擊嘅學民思潮召集人黃之鋒，當然連酒店門口都難入，但有個別學民仔早就入咗酒店，原來佢哋玩咗一招「木馬屠城」。
設計圖片及對白
派「生面口」成員入住
學民發言人Oscar黎汶洛話，其實佢哋喺李飛來港兩至三日前先決定訂一間雙人房，前日早上安排五至六名「生面口」成員入住，到晚上本來想當面畀抗議信李飛，不過同學踩線期間打草驚蛇，保安見佢哋手持抗議標語，惟有提早發難，結果佢哋被趕離酒店。
Oscar話，由於時間緊急，幾名畀得起錢嘅學民成員就科款五千至七千元租房，尋日同酒店交涉後，對方除咗畀佢哋攞番個人物品，仲肯全數退番筆錢，今次都算係「全身而退」。佢講到明下次或會學綠色和平咁，諗多啲有創意嘅抗議行動喎！嘩，佢哋呢次簡直就係無本示威，賺到盡喇！
講開又講，李飛早前南下深圳會見港區全國人大、政協，港區人大代表黃玉山被抽中第一個發言，尋日李飛喺亞洲博覽館開政改簡介會，但就遲遲不見黃玉山蹤影，最後臨散場時先見到佢匆匆趕至。點知黃玉山一聽到個會就嚟完結，即刻轉身走人，山長水遠嚟到卻過門不入，唔通佢入大嶼山志在「行大運」？
黃玉山因乜事遲足兩個半鐘？黃玉山話因為佢身兼公開大學校長，咁啱尋日係大學開學日，佢要主持完開學禮先走得，所以咪遲咗囉。話時話，尋日到場示威嘅仲有黃之鋒，佢係公開大學嘅新鮮人，唔知黃玉山事前有冇同黃之鋒交流吓，或者大家約埋一齊搭車走呢？但係一提到呢位惹火學生，黃玉山就唔係好想講，只係話冇見到佢，問多幾句就耍手擰頭。
