零售下跌反加租 經濟前景更添憂

七月係傳統零售旺季，原本預期就算冇增長，都可以保持平穩，點知到頭來又係錄得負增長。港府統計數據顯示，七月份零售總銷貨價值按年跌百分之三點一，係連續六個月下跌，問你怕未。奇怪嘅係，被視為經濟晴雨表嘅租務市場，竟然逆市乾升，借用港府財金官員嘅口頭禪，係「反周期」而動。

本報早前報道過，唔少業主寧願舖頭丟空，都要企硬加租，有啲甚至飛擒大咬加租九倍添，結果搞到吉舖潮不斷擴大，仲由銅鑼灣、尖沙咀等鬧市蔓延到上水及元朗區添，咁搞法，租務市場遲早崩潰嘅咋。

零售業不景，舖租反而一升再升，市民點睇呢？「東方報業民意調查」顯示，對於吉舖潮蔓延業主仍然瘋狂加租，近五成受訪市民指咁做等同殺鷄取卵；兩成二人認為會拖垮整個租務市場；兩成四人指係違反市場定律，不利經濟。

正如零售業內人士話齋，內地旅客改變消費模式，出手再冇以前咁豪，業主仲瘋狂加租，雙重打擊之下，縮減營業規模係唯一選擇，業主分分鐘因加得減，得不償失嘅咋。上述調查亦發現，三成八受訪者認為商舖會捱唔住，遲早出現裁員結業潮，近兩成人指吉舖情況會蔓延。

一句講晒，成也個人遊，敗也個人遊，個人遊帶動香港經濟發展，同時亦帶來好多問題，主要係客源單一化，店舖單一化。傳統街坊舖紛紛結業，由財大氣粗嘅連鎖店、藥房同化妝品店取而代之，區內居民生活不便，怨聲載道，中港摩擦不斷。事實上，將所有雞蛋放喺一個籃，風險有幾高，牛頭角順嫂都知啦，偏偏港府官僚唔知，中港矛盾搞大咗，先至話要檢討個人遊，有冇再遲鈍啲吖。

即係咁，個人遊備受爭議，本來檢討無可厚非，但係喺零售業不景嘅情況下再減少旅客數目，只會雪上加霜。受訪市民亦對檢討個人遊大表憂慮，其中兩成三認為會令零售業雪上加霜；三成五話會出現連鎖反應，影響香港經濟；亦有三成六認同應該設立邊境購物城，減低衝擊。

話時話，要求設立邊境購物城早就唔係新建議喇，可惜港府借咗聾耳陳隻耳，一於闊佬懶理，搞到個人遊好事變壞事，港府官僚成事不足，敗事有餘，簡直係添煩添亂，叮！