「冰桶挑戰」席捲全城,好多政界中人已經爭住挑戰,但論娛樂性,又點少得元朗區區議員梁福元呢。福元哥嘅「蛋糕頭」以又硬又挺見稱,聞名港九新界。前日終於輪到福元哥被點名進行冰桶挑戰,結果冰水難敵「蛋糕頭」,福元哥單憑密度極高嘅髮型,就好似擋風玻璃咁跣走晒啲水,而且淋冰後掃一掃就堅挺番,呢啲咪叫真正硬漢子囉。

梁福元淋冰後,個頭只冧咗一陣,就立刻堅挺番。(互聯網圖片)

香港肌健協會前日喺元朗舉行淋冰挑戰,因為之前元朗區區議員黃卓健點名挑戰福元哥,福元哥當然唔會走數啦。前日個活動本來已經籌到六千幾蚊,福元哥話好頭好尾,即場拎多四張金牛出嚟,令善款變成一萬蚊。不過都仲未算高潮戲肉,當福元哥真正淋冰時,大家先見識到佢嘅頭髮違反物理定律,淋水淋極都仲好堅挺,在場觀眾無不驚訝。

事後福元哥自爆,話啲頭髮「天生咁硬」,而且生長速度驚人,細細個開始就要每兩星期剪一次頭髮,如果要保持呢個「蛋糕頭」,仲要三星期電一次至得。聽聞淋冰當日福元哥仲有少少感冒,不過佢話為咗慈善無辦法,惟有頂硬上啦。

第一手消息請下載on.cc東網iPhone/iPad/Android/Windows Phone Apps