政壇：全民退保冇時間表團體促政府「找數」
由香港大學學者周永新負責完成嘅全民退保研究報告已出爐，建議向長者每月發放三千元老年金。社會上對建議存在好大嘅分歧，但有團體就認為報告已反映本港有能力落實政策，只係政府遲遲未肯交代進一步嘅計劃同安排，計劃約見兼任扶貧委員會主席嘅政務司司長林鄭月娥，要求對方「找數」。
聯席成員攞住印有代表政府、市民同商界嘅水壺淋水，寓意全民退保要三方供款維持財政穩定。
「將問題拋去金融市場」
爭取全民退休保障聯席尋日召開記者會，發言人黎婉薇喺會上話爭取全民退保十多年，但政府推出嘅強積金計劃「將問題拋去金融市場」，要市民自行承受風險。聯席重申，勞、資同官三方供款先可以令長者有穩定嘅退休生活。聯席將約見林鄭，要求政府喺明年施政報告交代推行時間表，同埋提出具體方案諮詢公眾。
