政壇：阻街電箱換新衣追憶舊時光
行人道上毫不起眼，甚至有啲「阻街」嘅供電電箱，原來可以變身成街頭藝術品！起動九龍東辦事處喺前年委託顧問團隊開展九龍東工業文化研究，為記錄觀塘同九龍灣一帶嘅工業故事，最近陸續為駿業街同巧明街一帶嘅電箱塗上「新衣」，記錄發源於該處的香港製造品牌，包括菊花牌乳膠漆、駱駝牌水壺同曾風靡一時嘅椰菜娃娃等，讓途人邊行邊重溫本港盛極一時嘅工業文化。
起動九龍東辦事處為記錄觀塘同九龍灣一帶嘅工業歷史，將美化該區嘅電箱，令它們化身街頭藝術品。
駿業街遊樂場正進行優化工程。
發展局局長陳茂波尋日喺網誌話，每個電箱均會承載不同工業文化故事，好似有電箱會油上中華製漆早期嘅廣告宣傳圖像，寫上當年家傳戶曉嘅電視廣告歌歌詞「菊花牌乳膠漆，顏色就靚囉！」呢間公司喺五十年代末遷入觀塘道新廠房，係喺區內設廠嘅先行者。
生產「椰菜娃娃」嘅廠商開達實業亦喺八十年代進駐九龍灣；其他本土品牌，例如維他奶、益力多、七喜、玉泉、伊人恤同駱駝漆等，亦有屬於佢哋嘅工業故事，市民可透過電箱一一重溫。此外，區內四十多年歷史嘅駿業街遊樂場正進行優化工程，預計本月竣工。
