話說人民力量嘅立法會議員「慢必」陳志全,早前喺政改爭議呢個敏感時刻竟然去咗德國,仲同西藏流亡精神領袖達賴喇嘛見面添!究竟佢哋傾咗啲乜呢?慢必尋日出席一個活動時就話,其實今次主要係去參加幾年一次嘅漢藏交流會議,順便去參與達賴做主講嘅講座,又話去完呢次會議,先知原來香港同西藏嘅狀況好相似,包括有中共呢個共同對手,抗爭行動又被妖魔化等。不過,慢必話達賴依家其實只講佛法,唔提政治,所以係非常溫和嘅人喎。其實講嚟講去,係咪達賴懶理慢必咋!

慢必話達賴依家只講佛法,唔提政治。

有冇談及香港政改問題?慢必就話冇傾得咁仔細,不過有「西藏流亡政府」之稱嘅藏人行政中央政府就同佢哋講,話佢哋依家主張「中間道路」,即係以合乎中國憲法嘅方式嚟達致真正嘅自治。慢必又話,達賴亦有強調對話嘅重要。莫非達賴都建議佢哋就政改問題,同中央對話?

第一手消息請下載on.cc東網iPhone/iPad/Android/Windows Phone Apps