正所謂「三軍未動，糧草先行」，打仗真係冇錢不行。仲有唔夠兩年，又嚟到新一屆嘅區議會選舉，之後又有立法會選舉，所以近呢幾年，政黨為求籌得多啲款項應付選舉，都各出奇招，好似建仔嘅領導層喺佢哋嘅籌款晚宴賣完字畫又賣藝，最後籌得天價七千萬元，都咪話唔誇張。之不過，籌款好講噱頭同技巧，手腕差嘅話，募捐變趕客，咁就倒米喇！

設計圖片及對白

講緊嘅喺公文袋，據聞佢哋嘅立法會議員「阿毛」毛孟靜前年做籌款晚會嘅司儀，就得罪咗好多人，所以唔少人舊年聞及公文袋籌款晚會，都有避之則吉嘅諗法。

有知情人士話，阿毛自前年做過公文袋籌款晚會司儀後，就被公文袋雪藏，皆因佢好唔識做，唔單止事前冇通知啲嘉賓要上台捐錢，叫咗啲嘉賓上台，就話人哋捐咗幾多，叫嗰位嘉賓最少都要捐幾多喎，所以咪令啲嘉賓覺得公文袋同搶錢冇分別囉。其中盛智文前年被屈後，舊年就索性唔出現嘞。呢啲咪叫做趕客囉！

白鴿黨無懼醜聞繼續賣畫

另一泛民政黨白鴿黨舊年嘅籌款晚宴爆出賣假畫醜聞，事後「AV仁」何俊仁要公開向投得假畫嘅前高官「肥亨」馬時亨道歉，而吞咗落肚嘅善款都要嘔番出嚟，即刻退款畀肥亨，搞出個大頭佛出嚟，AV仁真係難辭其咎。咁白鴿黨即將舉行嘅籌款晚宴，佢哋又搞啲乜嘢花樣出嚟呢？

據聞，白鴿黨至今仍然覺得賣假畫係奇案一宗，但佢哋今年依然會有賣畫環節，但佢哋就非常謹慎，做足安全措施，其中一項措施就係邀請埋嗰幅畫嘅畫家到場監督拍賣過程喎！梗係啦，前車可鑑，見過鬼仲唔怕黑咩！

第一手消息請下載on.cc東網iPhone/iPad/Android/Windows Phone Apps