地產獨大百業難 青年創業談何易
俗語話，工字不出頭，好多年輕人都想一圓創業夢，過吓老闆癮。可惜吖，喺經營成本高企嘅今時今日，創業一啲都唔易，除咗要有創意，更加要資金及人脈關係，少一瓣都唔掂o架。
即係咁，勞工處○七年起推行「青年就業起點計劃」，為十五至二十九歲青少年提供自僱支援，例如提供會議室、宣傳品「打版」以及法律顧問等免費服務，仲時不時搞吓展銷會，方便年輕創業者接觸唔同類型客源。本來呢，呢項計劃出發點幾好，都算用心良苦嘅，正如有參與嘅年輕人話齋，相關計劃幫佢哋慳咗三成開業成本，以便可以集中火力引入唔同貨源喎。
真實情況又係點嘅呢？原來唔少年輕創業者都係靠免費租用嘅攤位展銷同搵客，有啲就喺免費會議室度橋打躉，同真正嘅創業打天下完全係兩回事。開講有話，三軍未動，糧草先行，創業最大嘅成本莫過於租金，依家有免費舖位提供，梗係可以企得住喇，問題係日後自己租舖經營，又頂唔頂得順呢？
所以話啫，勞工處協助年輕人創業，提供埋免費地方，無疑係用心良苦，可惜幫得一時唔幫得一世，呢種做法根本唔係長久之計。正如植物喺溫室裏面可以茁壯成長，但未必抵受得住出面嘅狂風暴雨咋。係人都知，家陣地產獨大，舖租長升長有，高處未算高，就算最近零售業吹淡風，業主一於少理，繼續瘋狂加租，有人甚至寧願舖位丟空都唔肯割價，你話係咪誇張吖？鬼咩，你唔租，大把財大氣粗嘅連鎖店爭住租，皇帝女唔憂嫁咯喎，業主又點會手軟吖。
老實講，今時今日租魔肆虐，好多有口碑嘅傳統老店尚且頂唔順，執吓一間又一間，何況係初出茅廬嘅後生仔。呢，近年愈來愈多年輕創業者因為不斷上升嘅舖租同生活開支，被迫轉戰深圳，有啲更索性搬埋上去住添。香港地連居住都成問題，仲話創業喎，咪玩啦！
話時話，香港營商環境惡劣，租金高企只係其中之一，更重要嘅係產業結構單調，唔係炒股，就係炒樓，根本冇幾多空間畀年輕人創業。
講多無謂，食多會滯，如果政府真係有誠意幫年輕人，所謂發展優勢產業呀、將產業「做多做闊」呀，唔該坐言起行，咪再得個大隻講喇，否則嘅話，年輕人莫講話創業艱難，分分鐘連搵份工都成問題呀。近年愈來愈多年輕人走上街頭，而且愈來愈激進，咪就係因為冇出路，睇唔到前景囉，呢個先至係急需解決嘅問題吖，知冇？
