政壇：搞搞政：被邀落區派檸檬 Greg蘇辣慶工聯會
商務及經濟發展局局長蘇錦樑（Greg蘇）負責嘅事務唔少，工聯會立法會議員陳婉嫻在暑假期間，請咗唔少問責官員落區，偏偏Greg蘇係點都請唔到嘅，有工記中人透露，嫻姐最近想在九龍城其中一條街打造成「潮州街」，想請Greg蘇落區視察，但Greg蘇十問九唔應，追極都係藉口多多，大派檸檬，卒之搞到嫻姐同工聯會中人火都滾埋。
設計圖片
呢個暑假，多位問責官員應邀落區，首先有勞工及福利局局長張建宗幫長者砌家電，跟住有食物及衞生局局長高永文幫長者把脈、量血壓等，但Greg蘇唔係話唔得閒，就話好忙，上星期，Greg蘇淋冰桶一幕畀嫻姐見到，嬲到爆咗句話：「Greg蘇得閒淋冰水，唔得閒見市民」喎。
嫻姐唔係「太后」，啲官員亦唔需隨傳隨到，只係嫻姐已經諗好一套刺激本土經濟嘅計劃，因應九龍城潮州人多嘅緣故，有意將當區其中一街道打造成「潮州街」，早前仲叫身為潮州人嘅高永文帶Greg蘇周圍食潮州嘢。搞呢啲騷，議員同官員有機會曝光威水吓，照計係雙贏，但Greg蘇偏偏有牌都唔上，佢嘅副手梁敬國就早已應承嫻姐，去九龍東地段睇吓旅遊發展項目及本土經濟發展等設施，但似乎洩唔到工聯會一肚怒氣囉。再加上Greg蘇日前又去咗經民聯沙田惠食舍參觀，更畀人大細超嘅感覺喇。
