政壇：王淑筠心思思想搞社企
接手家族珠寶生意嘅香港青年聯會會董王淑筠（Diana），膽粗粗代理咗意大利知名朱古力品牌，幾年工夫搞得有聲有色，第三間分店開張才兩個月，佢已開始物色更大的舖面，打算開第四間分店。初次創業就咁順利，激發Diana高昂鬥志，心思思想與朋友合作成立一間社企幫釋囚重返社會，佢仲想搞搞新意思，只係具體做乜要賣個關子先。
王淑筠（右）獲得丈夫高福辰鼎力支持，放心喺商界搏殺。
事業咁順利，兼任香港中小型企業總商會零售品牌委員會主席的Diana都樂於同大家分享，遲啲將開講座與一班企業二、三代探討承傳之道，皆因如何喺守業中創業係好多接班人的共同難題。
講起佢打理間朱古力店的秘訣，Diana表示，勇於創新的精神好重要，好似店中極受歡迎的雪糕，除咗由總公司入口傳統口味之外，佢仲自創咗一啲本地新口味，例如好有亞洲特色的榴槤味雪糕，佢仲將至愛的伯爵茶加入雪糕中，連某知名食家都讚好。
