政壇：迪士尼高層冰桶找數停不了
「冰桶挑戰」熱潮未退，呢排嘅主角輪到主題公園嘅頭頭，早前，海洋公園主席孔令成同一眾高層淋冰桶，當時就點名香港迪士尼樂園行政總裁金民豪（Andrew），尋日Andrew勇敢應戰，佢仲搵埋迪士尼一班高層，着住米奇同米妮T恤接受挑戰，一人一大桶冰水兜頭淋，找咗數，趁機又宣傳一番，何樂而不為？
金民豪拎住大桶冰水兜頭淋。
Andrew話迪士尼過去兩年都有招待肌健協會嘅受助人同家屬免費入園歡度快樂時光，希望今次活動可以提升公眾對肌萎縮性脊髓側索硬化症（ALS）嘅認識。淋完冰桶後，Andrew都發出佢嘅挑戰書，點名內地長隆集團總裁陳萬成，同埋好友大嶼山發展聯盟主席哈永安、香港旅遊發展局總幹事劉鎮漢接力。呢一棒傳開去，找數熱潮睇怕有排燃燒，唔知會唔會延續到天寒地凍時呢？
