政壇：張建宗教做好老闆
香港失業率近年喺百分之三左近徘徊，接近全民就業，打工仔唔憂冇工做，但跳槽、劈炮盛行，勞資關係仲不時有摩擦，勞工及福利局局長張建宗（小肥張）尋日出席一個活動後，被問到老闆之道，佢就話，一向主張企業應該多啲人情味，只要僱主多啲體恤員工，員工一定會銘記於心，對公司更加忠誠用心，咁就唔會令僱傭關係咁冷淡，事關人心係肉做o架嘛！
設計圖片
唔放鬆影響效率
小肥張尋日上午趕場去一個活動做主禮嘉賓，陪佢出席活動嘅係政治助理黎穎瑜（Jade）及新聞秘書Angela，佢哋兩個不約而同話，由於尋日係周末，但局長行程係要接連趕三場，所以局長就畀佢哋喺完騷後，同家人一齊食晏。所以，佢哋約咗屋企人喺商場碰面，短敍天倫後再陪小肥張趕下一場，唔怪得讚老細喇。
小肥張就話，有時鬆一鬆仲好，例如大、中、小學放榜日，僱主不如畀員工放假去處理，否則，員工都係心掛掛，一樣匿入洗手間講電話，成日心情忐忑不安，仲影響工作效率喇。
小肥張仲提起前政助莫宜端，莫任內接連生兩名小朋友，小肥張自爆，佢成日叫莫宜端唔使吓吓返辦公室，因為今時今日科技進步，好多嘢可以用電腦處理，咁樣生活及工作先可以取得平衡。
雖然小肥張嘅建議唔錯，有助緩和勞資關係，但香港九成以上僱主係中小企業，喺高租金、高成本壓力下，經營者同中小企業負責人壓力都好大，小肥張鬆啲手，涉及嘅係政府資源，因為佢嘅身份只係上司，唔係僱主，但一般僱主就要真金白銀咁付出，兩者係有分別嘅。
