經濟不景爭拗多 香港點會有運行
「吹呀吹，讓這風吹，抹乾眼眸裏，亮晶的眼淚……」點解太一叮突然歌興大發？係咁嘅，最近本港經濟吹淡風，大行相繼下調全年經濟增長預測，其中滙豐更加喺短短七星期內兩度調整，由最初嘅百分之三點七降至百分之二點五。你話嘞，經濟吹寒風，係咪值得擔心吖。
大行一致睇淡香港經濟，唔係冇原因嘅。好簡單，零售數字已經五連跌，經濟又點會好吖。
係人都知，香港經濟主要靠服務業同零售業食胡，可惜隨住個人遊旅客人數增長放緩，以及消費模式轉變，零售業已無以為繼。而更令人擔心嘅係，美國出年好可能進入加息周期，對香港經濟帶嚟幾大衝擊，仲係未知之數。正如經濟師話齋，本港第二季經濟增長三年嚟首次出現收縮，反映本港經濟正經歷周期性放緩，加上內部需求減弱，近月失業率掉頭回升，反映就業情況有轉壞迹象。不過佢強調，今次下調經濟預測，未有納入政治因素嘅影響喎。
即係咁，香港基本經濟因素欠佳係人都知，但相對嚟講，政治因素帶來嘅衝擊可能更加大鑊。大家應該記得，滙豐早排發表報告，直指佔中可能令中港關係惡化，其後修訂版本中淡化政治因素，一度成為市場熱話。事實上，唔少經濟學者亦指出，佔中一旦發生，將會對香港產生災難性影響，甚至成為經濟步向衰退的催化劑添。
唔係危言聳聽o架。人大常委會即將就政改一錘定音，泛民揚言發起「一波一波」嘅抗爭行動，實行玩鋪勁，一副山雨欲來風滿樓嘅架勢。最好笑嘅係，有人居然話如果出現暴力場面，會叫停佔中運動喎。咪玩啦，你估家陣玩電子遊戲，話停就停咩。正所謂，黃台之瓜，何堪再摘，香港經濟環境已經咁差，萬一佔中場面失控，香港大亂，隨時嚇走投資者，到時雪上加霜咯喎，唔係講玩o架！
講開又講，回歸十七年，亂足十七年，香港由經濟城市變為政治城市，三日一遊行，五日一衝擊，以前嘅「動感之都」，已經淪為「動亂之都」，家嘈屋閉，永無寧日，有人慨嘆唔到香港，唔知文革仲未停，真係一啲都冇誇張。
嗱，大家有眼見，今時今日社會愈來愈分化，無良政客煽風點火，將經濟民生問題政治化，一味上綱上線，再加上港府無能，授人以柄，搞到施政寸步難行，一事無成，香港點可能唔沉淪吖。一句講晒，覆巢之下無完卵。繼續政治掛帥，香港遲早玩完嘅咋，叮！
