潮語「找數」嘅意思，同字面嘅意思其實差唔多。最大分別係潮語「找數」嘅「數」未必一定係真金白銀，但凡應承咗人做一啲嘢，而你去實踐承諾都可以叫做「找數」。又或者你同人喺網上輸賭：「如果2017行政長官有真普選的話，切乜都得！」如果中央突然System Error人大常委會突然「跳掣」，畀香港有公民提名嘅真普選的話，咁你就要「找數」，喺身上面搵啲嘢出嚟切畀人。相反，就係「走數」。

上期講過，近來喺社交網站經常出現一啲短片，內容都係一啲人淋自己冰水，話要為ALS病人籌款。ALS即係Amyotrophic Lateral Sclerosis，中文學名係肌萎縮性脊髓側索硬化症，又名漸凍症。呢個係一種罕見嘅遺傳病，身體有一組遺傳基因突然「因子突變」，致身體製造唔到一種酵素，大腦慢慢不能控制一啲隨意肌。患者會突然發病，經過5至10年，慢慢退化至連行動、說話、呼吸都需要儀器幫助及要人照顧。由於呢個病罕見，全美國大約只有三萬人患病，所以ALS長年受到忽視，藥廠更不會投放資源研究。美國於是有人發起「淋冰桶」挑戰，喚醒人們關注ALS病患及家屬，並為ALS組織捐款。呢個熱潮席捲全球，以香港為例，一個相關組織「香港肌健協會」，兩個星期已收到過千萬捐款，係以往全年捐款嘅26倍！香港嘅「淋冰」短片，片尾都會有一句叫被點名挑戰嘅人「找數」，令到呢個網絡用語，一時間人人都掛喺嘴邊。

不過數還數路還路，基本法寫明香港係會有民主選舉，唔知中央幾時會「找數」呢？不過咁，雖然數係一定要找，但呢個世界有樣嘢叫「拖數」，中央「拖」到2047都唔找，香港人都奈佢唔何。香港人可以做嘅，可能只有走上街頭，用群眾壓力去「追數」。不過你有權「追數」，人哋都有權唔「認數」。吓？咁都得？唓！2014年嘅香港有咩唔得？

第一手消息請下載on.cc東網iPhone/iPad/Android/Windows Phone Apps