「腦細，人生有幾多個十四年？所以一定要加我人工！」少膽虫苦苦哀求。淫賤黎口叼雪茄，「『實死』、『實死』，加你人工我就真係唔掂。」為咗一生幸福，少膽虫決定動之以情，「腦細，你都做過奴才，實明白我嘅心情……」

又係一輪暴打，「少膽虫，你夠膽寸我係美帝奴才？」淫賤黎氣憤難平。「腦細，我幾時有寸你？我係話你都買過樓，做過樓奴，實明白唔食唔住十四年，先買到樓嘅痛苦。」少膽虫講到眼淚盈眶。淫賤黎恍然大悟，「唉，做奴才有咩好……」少膽虫衝口一句，「腦細你都叫做過奴才，我依家連奴才都無得做！」

「既然你咁想有瓦遮頭，我就出手幫吓你啦！」估唔到淫賤黎都有良心發現嘅時候。「多謝腦細肯加我人工！」少膽虫差啲想叩頭謝恩。

「非也！非也！我係會減你人工，等你夠資格申請公屋，呢個年代仲買私樓，傻的嗎？」

第一手消息請下載on.cc東網iPhone/iPad/Android/Windows Phone Apps