政壇：搞搞政：召集飯盒會屢招怨 阿基自讚稱職
泛民主派政黨每星期都會召開「飯盒會」，召集人由各黨輪流派人做，民協馮檢基（阿基）嘅任期將於九月中屆滿，改由梁家傑出任新嘅召集人。阿基卸任在即，泛民中人趁機吐苦水，據聞有「三宗罪」咁多，包括唔識主持會議、爆響口等，可見召集人唔易做，阿基都係抖吓好過。
設計圖片及對白
阿基自九十年代初出任立法局議員以來，多年來都係單打獨鬥，又話要同中央「又傾又砌」，但反而畀人立場搖擺不定嘅感覺，去年，佢接任飯盒會召集人，經常代表二十三位泛民成員對外講述飯盒會立場，曝光率大增，但問題亦隨之而來，有泛民中人寸爆阿基，話佢唔識得控制飯盒會開會節奏，加上佢性格溫和唔識得「叫停」，由得大家講到天荒地老，開會開到天黑都未完。
不時「爆響口」惹不滿
而且不時唔小心「爆響口」，譬如今年一月初，當中聯辦透過立法會主席曾鈺成向泛民「探口風」，問佢哋願唔願意接受中聯辦回請，泛民仲喺飯盒會上熱烈討論緊，阿基轉頭已經爆咗出嚟，令事件「見光死」，事後阿基被泛民鬧爆，搞到每次喺飯盒會完結前，劉慧卿（卿姐）都會向阿基「訓話」，叫佢見記者時慎言。阿基接受查詢時重申，自己從來都唔會向傳媒亂講嘢，如果會上有人講過有嘢唔可以講，佢就一定唔會講，而佢又有機制控制開會節奏，總之佢就講到自己非常稱職啦。
