政壇：慢必政改敏感期見達賴
全國人大常委會即將就本港政改作出重要決定，正當北京、香港兩地鬧得熱烘烘之際，人民力量立法會議員陳志全（慢必）卻冇留港，反而喺社交網站晒新相，原來佢去咗漢堡。
慢必喺社交網站上載佢同達賴見面嘅照片。（互聯網圖片）
慢必原來靜靜雞去咗德國，尋日凌晨時分，佢就喺社交網站上載同西藏流亡精神領袖達賴喇嘛見面嘅相片，仲自爆今次係出席喺漢堡舉行嘅漢藏交流會議。雖然慢必早前已預告有機會見達賴喇嘛，亦唔會講政治議題，但佢就自言香港同藏人面對緊共同嘅問題，好似保持特有文化等，所以港人「不惜公民抗命，爭取民主選舉」，將話題又再扯到政改去。至於佢有冇同達賴喇嘛面對面討論香港普選問題？慢必就懶神秘話，今晚返香港再講喎！
