肥胖嘅人不時會感到買衫難,睇啱個款,偏偏又冇尺寸,真掃興!金融服務界立法會議員張華峰嘅身形好有分量,買衫對佢嚟講都係一件煩惱事。不過,佢幾個月前同議員林健鋒、盧偉國去法國玩,就遇啱當地時裝店大減價,仲有大把尺寸係XXXXL嘅款式任揀,確係意外驚喜,明明買完都返轉頭再揀多轉,最後掃咗大批戰利品返香港。

張華峰同林健鋒、盧偉國去法國玩,發現法國時裝店有好多大碼衫褲,所以食多啲都唔怕。(受訪者提供)

(受訪者提供)

張華峰話︰「喺香港買衫一係未必有鍾意嘅款,到鍾意又未必有咁大件。」難得法國啲時裝店有XXXXL尺寸仲有大把款式,真係機不可失。

張華峰仲笑笑口話,當地最大尺寸並唔係佢着開嘅四個「X」,而係五個「X」,似乎佢覺得自己有繼續膨脹嘅空間咁喎。可能食過翻尋味,佢上月又同家人重遊舊地,唔知今次又掃咗幾多貨呢?

另外,本身係菲律賓華僑嘅張華峰之前在馬尼拉人質事件上都出咗唔少力,又促請菲律賓總商會同菲律賓政府溝通,當地政府今個月就頒咗個象徵榮譽市民嘅「金鎖匙」畀佢。不過,張華峰就話要保持低調,所以費事去攞喎。

第一手消息請下載on.cc東網iPhone/iPad/Android/Windows Phone Apps