政壇：莊偉茵送電器教埋點用
做善事，既要金到，更要力到，中電企業發展總裁莊偉茵（Quince）所屬公司早前透過區議會推薦，向九龍及新界嘅弱勢家庭送贈四千套慳電膽、電飯煲、電風扇及電磁爐，送嘢都未夠，日前佢哋仲落埋區，提供上門指導服務。
陳振彬發揮到高大身材嘅作用，幫長者更換天花慳電膽。
莊偉茵（右）同陳振彬（中）聯袂探訪受助者家庭。
雖然話送嘅物件都係日常家庭用具，但Quince日前都拉埋觀塘區議會主席陳振彬（Bunny），去到部分受助者家中，跟進吓受助人係咪安全正確咁使用電器，期間，仲發現真係有長者唔識使用電磁爐，Quince即刻教導長者使用，仲送埋電磁爐專用嘅水煲及單柄鑊。呢日，Bunny咁啱發揮到高大身材嘅作用，幫長者更換天花慳電膽，又裝嵌埋電風扇，真係行善一條龍，夠晒貼心。
