政壇：黃家和急急出院為抱孫
香港餐飲聯業協會會長黃家和（Simon）早前入院成個月，原來佢月前由澳洲返港後腸胃不適，漏夜入急症室，起初以為係腸胃炎，檢查之下發現大腸血管閉塞，令營養無法輸送。據講呢個病認真罕見，群醫一度束手無策，最後由瑪麗醫院專家找出病因，喺Simon胸口開個細窿，插入喉管輸入營養液，藉此加快腸臟周圍嘅新血管生長。
黃家和出院後第一時間將男孫擁入懷中。（受訪者提供）
Simon苦笑話，入院一個月中，最慘係被醫生下令禁食三星期，體重在一個月間急跌二十磅，腰圍亦由三十五吋減至三十一吋，瓜子面再現，朋友都差啲唔認得佢。幸好近日病情好轉及出院，但為健康着想，佢話要戒酒半年，飲食亦要清淡。
原來Simon住院期間，黃家傳來喜訊，就係佢孫仔出世，重約七磅，乖巧精靈。Simon聞訊急急腳出院，將孫兒抱在懷中，身上病痛都忘記晒。佢為男孫取名「黃曉峰」，寓意日出山峰，夠晒詩意。
