位於金鐘嘅政府總部「門常開」、立法會大樓及添馬公園等,已經成為維港兩岸一道風景,不過,大樓落成以來,醜事多多,早幾個月更因立法會被衝擊,被人撞到面目全非。不過,「門常開」及系列建築最近卻接連獲得兩個國際建築獎項提名,建築師嚴迅奇(Rocco)及建築署人員,尋日更帶同國際組織城市土地學會(Urban Land Institute)頒發嘅全球卓越獎(Global Awards for Excellence)評審委員到場視察,呢件事本來令人興奮,但唔知趕工及衝擊等事件會唔會拖累嚴迅奇攞獎呢?

設計圖片及對白

種下豆腐渣隱患

Rocco尋日早上帶同國際組織城市土地學會一男一女外籍評審員,巡視咗「門常開」一至兩個鐘,仲睇埋立法會會議廳、教育廊、甚至添馬公園、特首辦公室等。我哋同Rocco及團隊傾咗幾句,許李嚴建築事務所董事譚偉霖(William)話,今次主要睇公共地方,因為獎項係想彰顯建築物對社區貢獻、保護環境及回應社會需要。佢指出,會議廳引入自然光係創新設計,添馬公園亦可回應市民需求,將行人帶落海濱喎。

不過,「門常開」啟用至今甩漏不停,雨天更因漏水而「水長流」,水桶陣隨處可見,早前紅黃雨期間,立法會大樓仲滲水添。啟用以來改善工程好似未停過,當然,呢啲都同「貪曾」前特首曾蔭權爵士任內好大喜功有關,佢為求「門常開」及立法會大樓趕及喺佢卸任前落成,搞到工程又趕又急,被指種下豆腐渣隱患。加上早排立法會又被示威人士衝擊,依家示威區仲未開放,政府總部東翼「公民廣場」亦要加設圍欄,咁會唔會影響到「門常開」嘅原意呢?

William就話,冇向評審講到加強保安問題,皆因兩人住喺香港最少六年,清楚社會發生咩事喎,而衝擊事件亦同獎項無關。佢又透露,班評審十月會喺紐約舉行會議,到時就會知結果。

第一手消息請下載on.cc東網iPhone/iPad/Android/Windows Phone Apps