電話騙案禁不絕 私隱失守最堪憂

有數得計，警方今年首七個月接獲近一千四百宗電話騙案，較去年同期大幅上升三成半。電話黨一方面大小通吃，由女童嘅千元利是錢至退休長者半百萬元養老金統統唔放過，另一方面漁翁撒網，對象已經唔再局限喺長者或主婦。最值得留意嘅係，雖然騙徒成功得手比率稍微下降至兩成，但平均涉及金額卻大增一成六，都咪話唔得人驚。

即係咁，騙徒手法萬變不離其宗，來來去去兩三道板斧，例如最常見嘅「虛構綁架」，就佔整體個案超過一半嘞。今年三月之嘛，一名十一歲女童接到騙徒電話，對方訛稱係內地嘅表哥，要求佢將一千元匯番內地，好彩找換店職員醒目揭發陰謀。不過另一單就冇咁好彩嘞，一位七十歲婆婆收到電話，話佢個仔喺內地遭綁架，婆婆信以為真，結果被騙五十幾萬元棺材本。

好明顯，要打擊呢類電話騙案，當局除咗加強宣傳教育，提醒市民加強警惕，更重要係保護好市民私隱。你知啦，受害者好多時因為擔心親人安危，關心則亂，所以騙徒手法即使唔算高明，一樣不斷有人中招。話時話，如果騙徒唔係講得出目標嘅個人資料，相信冇咁易得手，所以話，保護私隱真係好重要o架。

一句講晒，港產官僚出名胡混度日，敷衍塞責，旨意佢哋保護市民私隱，蚊都瞓蛇都死。呢，本報曾踢爆內地多個網站非法取得本港網購單據，套取包括收貨人姓名、地址等港人個人資料後賤賣圖利，私隱署居然一直懵盛盛，直到媒體曝光至出手取締，市民認真多得佢唔少。

講開又講，港人私隱大失守，已經唔係今時今日嘅事咯。淨係講真人直銷電話吖，市民隨時隨地收到借錢或美容等推銷電話，當中唔少都講得出你姓甚名誰，仲有乜嘢私隱可言吖。直銷電話氾濫，市民飽受滋擾之餘，仲隨時墮入消費陷阱，早已經怨聲載道，要求政府將真人直銷電話納入規管，商經局竟然好似借咗聾耳陳隻耳咁，反而去信指摘私隱署，上演一場狗咬狗骨嘅鬧劇，醜態百出。

所以話啫，電話騙徒易防，直銷電話難擋，只要市民夠醒目，唔單止可以避免上當受騙，甚至可以協助警方將歹徒繩之以法添；反而喺當局放任自流下，直銷電話無王管，市民煩不勝煩。港產官僚害人不淺，真係一啲都冇講錯o架，叮！