慈善機構小寶慈善基金尋日中午喺深水埗一間小學舉行感謝禮,向支持旗下食物回收機構「惜食堂」的社會人士致謝。惜食堂主席「阿松」梁錦松特別邀請馬會大董陳南祿同行政會議成員Bernard陳智思等好友,齊去品嘗由回收食材炮製嘅飯盒。惜食堂創辦人Gigi董愛麗透露,十月份將喺深水埗中心廚房附近開設第一間社區中心,令煮好嘅愛心飯盒第一時間送到受惠人手上。

惜食堂將回收食材炮製成營養均衡的飯盒。

董愛麗預告十月將開設第一間社區中心,直接將飯盒送到有需要人士手上。

陳南祿都畀面去食飯盒。

陳智思(右)食得津津有味,梁錦松(左)即拉佢上台分享。

用料上乘 落足心機

阿松就話惜食堂現時有十八部冷凍及輕型貨車,每日穿梭港九新界各地向各食肆或超市收集可回收食用嘅食物,送去中心廚房烹調成營養均衡嘅飯餐,再由義工送到基層市民手上。

佢話中心現時每日生產四千六百份營養飯餐,每年更加可以回收四千噸剩餘食物,減少廚餘之外又可以幫到人。

講完一輪,阿松就請Bernard同陳南祿品嘗中心炮製嘅三款飯餐,包括芝麻雞、素菜卷同黃金蝦。

食咗唔夠二十分鐘,阿松就拉Bernard上台,笑住話「天下無免費嘅午餐」,叫佢同台下觀眾分享飯餐的味道。Bernard即時化身食家,大讚飯餐雖然唔使錢,但用料上乘,廚師亦都落足心機,唔會好似出面啲餐廳咁,將貨就價。佢愈講愈興起,笑稱覺得飯餐仲好食過國泰航空啲飛機餐喎!做過國泰行政總裁嘅陳南祿聽到即時面露苦笑表情,好尷尬。

惜食堂受到大家嘅肯定,Gigi真係飲得杯落,但佢仍未滿足,話雖然依家已經有唔少機構主動接觸佢哋捐出食物,但仍有唔少機構擔心捐出變壞嘅食物會影響機構聲譽,所以寧願將啲食物丟掉,佢希望社會攜手改變態度,更加惜食。

第一手消息請下載on.cc東網iPhone/iPad/Android/Windows Phone Apps